TRA yaongezewa nguvu kukusanya mapato

Na Neema Dandida

                          

                         Naibu Waziri wa Fedha na Mipango, Dk. Ashatu Kijaji.

Serikali ya Norway imeipatia Mamlaka ya Mapato Nchini (TRA) zaidi ya Sh. bilioni 10 kwa ajili ya kuwaongezea uwezo wa ukusanyaji mapato ya ndani ili kuondokana na bajeti tegemezi.

Kadhalika, fedha hizo ni kwa ajili ya kuwajengea uwezo wataalamu wa TRA kuhusu mbinu mbalimbali za kukusanya kodi kwa makampuni ya ndani na ya kimataifa ikiwemo makampuni ya gesi na mafuta.

Akizungumza na waandishi wa habari jana jijini Dar es Salaam katika halfa hiyo, Naibu Waziri wa Fedha na Mipango, Dk. Ashatu Kijaji, alisema fedha hizo, ambazo ni dola za Kimarekani milioni tano, zimetolewa kuisaidia TRA katika jitihada zake za kuimarisha ukusanyaji wa mapato.

Alisema lengo la kufanya hivyo ni kuongeza mapato ili kusiwapo na ukwepaji kodi, kuimarisha mpango wa ukusanyaji wa kodi na kuielimisha wananchi umuhimu wa kulipa kodi bila kushurutishwa.

Dk. Kijaji  alisema wamefurahishwa na msaada huo kutoka kwa serikali ya Norway kuendelea kuwasaidia kwa kuwa wanataka kuondokana na bajeti tegemezi na kuanza kujitegemea.

Alisema ili kuondokana na suala hilo wanatakiwa kuimarisha ukusanyaji wa mapato nchini ili kuwa na bajeti yao. 

Aidha, alisema tayari jambo hilo wameanza kulifanyia kazi ndiyo maana katika kipindi cha miezi mitatu iliyopita makusanyo ya kodi yameongezeka na kwamba mikakati yao katika kipindi cha mwaka mmoja ni kukusanya Sh. Trilioni 22

Alisema kwa sasa kuna mpango mkakati wa kuwafikia walipakodi ikiwa sehemu ya harakati za kuondokana na bajeti tegemezi.

“Uwezo tunao na mipango yetu ni kuongeza ukusanyaji wa mapato kufikia Sh. trilioni 22 kwa mwaka ambayo ni sawa na bajeti ya Tanzania,” alisema

Naibu Waziri wa Mambo ya Nje nchini Norway, Tone Skogen, alisema msaada huo unalenga kuboresha maendeleo ya biashara nchini na kuvutia uwekezaji ili kufanikisha maendeleo yaliyowekwa kwenye dira ya maendeleo

“Ni furaha yangu kuzindua ukurasa mpya wa ushirikiano wa masuala ya kodi kati ya Tanzania na Norway ,” alisema Skogen,

Skogen alisema ushirikiano kati ya Tanzania na Norway kwenye masuala ya ukusanyaji wa mapato ya ndani  umeimarika.

Naye Kaimu Kamishina Mkuu wa TRA, Alphayo Kidata, alisema lengo la mamlaka yake ni kuimarisha uwezo wa wataalamu wao katika kukagua maeneo makubwa hususan gesi asilia  na madini ili kuwahesabia kodi wanazotakiwa kulipa.

Alisema hawakuwa na kitengo cha kodi za kimataifa, hivyo Norway imewasaidia kuwawezesha kuyabaini kampuni ambazo hazilipi kodi 

Kidata alisema awali walipatiwa dola milioni 3 kwa ajili ya kusaidia uwezo wa ukusanyaji wa mapato ambapo msaada huo uliishia kwa mwaka jana.

chanzo ipp media