serikali kuwapa kipaumbele wawekezaji

Na Neema Dandida

waziri wa viwanda, biashara na uwekezaji Charles mwijage

Serikali imesema itatoa kipaumbele kwa wawekezaji wa viwanda wazawa ili kuimarisha uchumi wa nchi kwa kuweka mkazo kwenye  viwando vidogo na vya kati.

Akizungumza hayo wakati wa ufunguzi wa Mkutano Mkuu wa 16 wa Taasisi ya Sekta Binafsi Tanzania, Waziri wa Viwanda, Biashara na Uwekezaji, Charles Mwijage, alisema ujenzi wa viwanda utasaidia kuzalisha ajira kwa zaidi ya asilimia 40 ya vijana nchini kama ilivyoahidiwa na CCM katika Ilani ya uchauzi.

“Kuna msemo wa kikwetu unaomaanisha huwezi kumlisha mtoto wa Kware ili anenepe na kumwacha wa kuku, hivyo siwezi kumwacha mzawa nyumbani kwangu nikampa kipaumbele mgeni,” alisema Mwijage. 

Alisema umefika wakati muafaka kwa sekta binafsi kutumia nafasi zilizopo kuwekeza na kwamba serikali inahitaji ushauri kutoka kwa wafanyabiashara na itasaidia kuweka mazingira mazuri kwa ajili ya uwekezaji wa wazalendo.

‘’Tukisema ukweli ni kwamba kuna baadhi ya sera zilikuwa mbovu na ndizo zilikuwa kikwazo katika kukuza viwanda, hivyo wafanyabiashara waache kulalamika bali waseme ili serikali ifanyie kazi mawazo yao kwani Rais (John) Magufuli yuko tayari kufuata ushauri na kutekeleza ili kufikia azma yake ya viwanda.

Alisema kwa kipindi kifupi Watanzania wataona bei ya sukari kuwa ni kubwa lakini amelifanyia kazi na viwanda vya sukari vitajengwa vya kutosha nchini kwa kuwa baadhi ya wawekezaji wamejitokeza ili kujenga viwanda hivyo. Aliwaomba wananchi kuwa wavumilivu kwa sababu  serilkali imeamua sukari yote itakayouzwa itakuwa ya hapa nchini ili kuwanufaisha wawekezaji na wakulima wa miwa.

Alisema baada ya sukari, serikali sasa inaangalia uzalishaji wa mafuta ya kupikia kutokana na mawese yanayozalishwa nchini na kwamba ulimaji wa michikichi utaongezwa kwa kuwa kuna mpango wa kujengw kiwanda kikubwa cha kutengeneza mafuta mkoani Mtwara.

Mwijage alikiri kuwa viwanda vingi vilivyokuwa vikimilikiwa na serikali,   viliuzwa kwa bei ya kutupwa, lakini akasema serikali inapitia kiwanda kimoja baada ya kingine na kama vitakuwa havifanyi kazi kama ilivyotakiwa, vitachukuliwa na kurejeshwa kwa wananchi.

“Nimemwambia mmiliki wa kiwanda cha Bora kama kitakuwa hakizalishi viatu ifikapo mwezi wa tisa basi tutakichukua kwani hata bei aliyonunulia haifikii bei ya kiwanja Pugu Road,” alisema.

Kw aupande wake Mwenyekiti wa TPSF, Dk Reginald Mengi alimpongeza Rais Magufuli kwa kuthamini sekta binafsi nchini na kukusanya kodi na kuondoa ufisadi na rushwa, hivyo kufanya wafanyabiashara kujisikia raha wanapolipa kodi serikalini.

“Sekta binafsi imefarijika kwa jitihada na spidi (kasi) ya serikali kurejesha utawala wa sheria, haki na uwajibikaji katika sekta ya umma na kutoa uamuzi ambao unakuza biashara na uwekezaji,” alisema.

Chanzo ipp media