Rais Magufuli akutana na Katibu Mtendaji EAC

Rais John Magufuli akizungumza na Katibu Mtendaji wa Jumuiya ya Afrika Mashariki (EAC), Dk Richard Sezibera Ikulu

  Dar es Salaam.

RAIS John Magufuli amekutana na kufanya mazungumzo na Katibu Mtendaji wa Jumuiya ya Afrika Mashariki, Dk Richard Sezibera Ikulu Dar es Salaam.

Pamoja na mambo mengine, Rais Magufuli amepokea taarifa ya maandalizi ya Mkutano wa Wakuu wa Nchi wa Jumuiya ya Afrika Mashariki utakaofanyika Machi 2, mwaka huu mjini Arusha.

Rais Magufuli ndiye Mwenyekiti wa sasa wa Jumuiya ya Afrika Mashariki inayojumuisha nchi tano wanachama ambazo ni Tanzania, Kenya, Uganda, Rwanda na Burundi.

Akizungumza baada ya mazungumzo hayo, Katibu Mtendaji wa Jumuiya hiyo, Dk Sezibera amesema maandalizi kuhusu mkutano huo yanakwenda vizuri.

Amesema pamoja na mambo mengine mkutano huo, utajadili masuala kadhaa yakiwemo mpango wa kuanzisha viwanda vya magari ndani ya Jumuiya ili kupunguza uingizaji wa magari kutoka nje ya nchi na Marais kuzindua pasi ya kusafiria ya Jumuiya ya Afrika Mashariki.

Kuhusu hali ya Jumuiya, Dk Sezibera amesema inaendelea vizuri na alitaja baadhi ya mambo yaliyofanyika kuwa ni kutiwa saini kwa mkataba wa umoja wa forodha, makubaliano ya soko la pamoja na makubaliano ya sarafu moja.

Mengine ni kuwepo kwa mazungumzo kuhusu uimarishaji wa miundombinu kama vile reli na umeme ndani ya Jumuiya, na mazungumzo kuhusu umoja wa kisiasa.

chanzo ippmedia